فالچی قارداش

یازار : همدانلی

+0 بگن
شعری زیبا از استاد کریمی مراغه ای



فالچی

فالچی قارداش قاپودا دورما بویور گل ایچری

‏باجووین بیر ایکی ساعت سنه وار دردسری

 

منه آچ بیر کتاب آغزی نظر ائت طالعیمه

‏دولا نیم با شیوه ای جنیلرین تاج سری

 

الیمون یوخ نمکی هر کسه خوشلیق ائدیرم 

عوضیند اولورام تیرجفا نون سپری

 

قینانام، قینیم، اریم دشمن اولوبلار هاموسی 

بالدیزیم خشک اولاقویمور گوزیمون اشک تری

 

بیرده دؤرد ایلدی گلین گلمیشم اولمور اوشاقیم

چوخ دوالر یمیشم اولمیوب اما ثمری

 

فالچی بیر مشتریانه خانما سالدی نظر 

اکمیوب مثلینی  گوردی بو جهانون پدری

 

اغزی فندق، دوداقی پسته، یوزی قرمزی گل

‏چکه بولمز بئله بیر نقشه نی چین نقشه گری

 

حلقه زلفد بیر خالی اولوب نقطه نون

‏پرتو روئی سالوب حیرته قرص قمری

 

شوخ دو روب سینه ده بیر جوت م... مثل انار

‏مست ائدیر نرگس شهلالری صاحب نظری

 

دئدی آدون دئدی قارداش کنیزون ماه زرم

‏ آتامون آدی محمد آنامون ادی زری

 

اگلشوب آچدی کتابین ائدوب اوراقه نظر

‏یوزینه قویدی الین فکره گئدوب بیر قدری

 

‏خانمون عشقی ائدوب طاقتینی زیروزبر

‏گوردی مشکل گوزی درک ایلیه زیر و زبری

 

نه خانم کپریکی اوخ قاشلاری مانند کمان

‏صید ائدر گو نده او توز دل کسه گر رهگذری

 

أغ بلوز قرمزی دامن ساری لیفکیک قره خوت

‏باشدا فر، قولدا قیزیل ساعتی، نایلون کمری

 

چکدی بیر آه باشین قوزادی باخدی خانما

‏یازیقین مزرعه صبرینه مالدی شرری

 

دئدی ای وای نه گورورسن دی گوروم فالچی داداش

‏سنی تاری باشیمون وار نه قضا و قدری

 

دئدی جادو ائلیوبلر سنه بیچاره باجی

‏سم قاتل اولی سن هر کسه وئرسون شکری

 

بیرکوله بوی، ساری توک واردی کمینونده سنون

‏اودی برپا ائلین ای باجی بو فتنه لری

 

بیر زبان بند دعا سی یازارام قینانووا

‏بیرده بیر یاخشی محبت دعاسی مختصری

 

قینووین بالدیزیوین باغلارام آغزین دیلینی

‏قویمارام بیر نفر اولسون سنه بو ائوده جری

 

گوبگون دوره سینه بیر طلسم وار یازارام

چوخ مجربدی وار اولاد ایچون آرتوخ اثری

 

سیه پونزا ساری موم بیراه اوج آرشین همایون

‏یدی رنگ ساپله من رفع ائدرم بو کدری

 

یازمارام اوزکیه افا منه خاطر یازارام

جنلردن بو دعا نون منه چوخدور خطری

 

‏خرجی چوخدور ولی سندن آلا رام اللی تومن

‏زعفرانیله گرک قاطی ایدم مشگ تری

 

آلدی بو سؤزلر الیندن خانمون صبر و قرار

‏دئدی واللهی بود ور باطل ائدن سحرلری

 

دوردی یخدانی أچوب تئزچیخادوب بیربالاکیف

‏او کیف آرتوردی همان فالچیا نور بصری

 

دئدی بو پوللاری قارداش کیشیدن جازلامیشام

‏ساتمشام یاغ دوگی، قند چای اریمون یوخ خبری

 

سنده بیر نحو ائله گلسون اله الله رضاسی

‏راحت ایله بو بلادن من خونین جگری

 

برکیدیپ پوللاری قوینوندا او ابلیس زمان

‏دئدی س... باباوین انگینه بیل مختصری

 

چیخادوب بیر طبقه کاغذ ائدوب جزما قره

‏دئدی آرتوخدی قلیجدان بو دعا نون کسری

 

خانمون وقتی او وقت اولدی یازیلسون گوبگی

‏قوزیوب دامنینی شوقیله اول شوخ پری

 

ایستدی فالچی دوا ته یتوره  سر قلمی

‏قلعه نین او سته وورا پرچم فتح و ظفری

 

میرزانی قویمادی مقصوده یته دست قضا

‏قاپودان فورا او ساعت خانمون گیردی اری

 

فالچینون پیسرینه سالدی بش آلتی شاپالاق

‏قشتروب آی گلون ئولدیردیله میر زا صفری

 

فالچی قورتولدی قاچوب نوبه یتیشدی خانما

او محبتدعاسی یاخشی باغشلور اثری

 

ال آتوب توکلرینه چکدی اوطاقدان ائشیگه

‏ساوریلوب جوجه کیمی هر طرفه موی سری

 

گلدی همسایه لر آخر ده تماشایه تمام

‏کوچیه سس دوشوب ئولدیردی اری ماه زری

 

ووردی آنجاق خانما نه یموسن ترشلی آش

‏ازیلوب قول قیچی قوش تک داغیلوب بال وپری

 

ئولوسین آلدیلار القصه الیندن کیشینون

‏آند ایچوب ساخلامارام من داخی بو بد گهری

 

عمری صرف ائتدی کریمی دئمه لهو و لعبه

‏بیر نصیحتدی اگر لطفیله قیلسان نظری

 

بعضی مردان خطا دیده و عیار و شرور

‏دولا نور فالچی لباسینده گزور کوچه لری

 

آللادور بینوا عورتلری مین حیله ایله

‏چکوری هم کئفینی هم جمع ائدور سیم و زری

 

اویان ایرانلی خانم یوخلاماق ایامی دگول

‏خلقین آفاقی دوتوب شهرت فضل و هنری

 

گون چیخوبدور هله سن تازه دوشوبسن یوخویا

‏سنی بیدار ائلمز بانک خروس سحری

 

عورته ئوز دیلیدور عمده محبت دعا سی

‏دیلینن رام ائدر انسان ئوزینه شیر نری

 

اؤل اخلاقیوی اصلاح ائله ساشما کلنی

‏دیلینن وورماگلن هر دیله بیر نیشتری

 

خوش دیلون اولسا تمام عیبلرون گو زدن ایتر

‏دیلدی محبوب ائلین خلقین ایچینده بشری

 

باغلا قرآنین او زین صاق قولا یوخ فایده سی

بقره سوره سی انسان ائلینمز بقری

استاد کریمی مراغه ای

 



آچار سؤزلر : همدان,